பெயரில் என்ன இருக்கிறது
சிலுக்காய் மாறிய விஜயலட்சுமி
உலுக்கினாள்
நல்லுலகத்தை
மரபணு மாற்றிய விதைக்கு
பைந்தமிழில் பெயரிட்டு
பயிரிடச் செய்தனர்
காவியமான காதலனின் பெயரை
குழந்தைக்கு வைக்க முடியாவிட்டாலும்
கேட்கும்போதெல்லாம் சிலிர்க்கத்தான்
செய்கிறது
கான் என்று முடியும் பெயர்களை
கணிணியால் பிரித்து
கவனமாய் விசாரிக்கின்றனர்
விமான நிலையக் காவலர்கள்
காண்டம் என்றோ
நாப்கின் என்றோ
கத்திச் சொல்ல முடிவதில்லை
நான்கெழுத்தைச் சொல்லி
முப்பதாண்டு காலமும்
மூன்றெழுத்தைச் சொல்லி
நாற்பதாண்டு காலமும்
ஆள முடிகின்றதென்றால்
என்னென்னமோ இருக்கிறது பெயரில்