ஒரு பொத்தானை அழுத்தியதும்
வருகிறது குளிர்காலம்
தேயிலைத் தோட்டத்தில் இவளுடன் நடந்ததை
கொட்டும் மழையில் காத்திருந்ததை
முன்பனிக்காலத்தில் அவள் அணைத்ததை
திருமாலின் தரிசனத்துக்காகக்
காத்திருக்கையில்
மழைநீரின் ஈரத்தில்
சற்றே சறுக்கி
மேலே சாய்ந்தவளின் குளிர்ந்த சூட்டை
மார்கழியில் நெஞ்சில் பதிந்த
பிஞ்சுப்பாதங்களின் சில்லென்ற மென்மையை
பீரின் நுரையை
பிறகொரு மழைநாளில்
நடுங்கிபடி நிகழ்ந்த ஆம்புலனஸ் பயணத்தை
நினைவூட்டியபடி
வந்தது குளிர்காலம்
ஒரு பொத்தானை அழுத்தியதும்
வெளியில்
வழக்கமான உக்கிரத்துடன் காய்கிறது வெயில்