*இயல் என்பது இயலாமை* - சிவாஜிசங்கர்

 (மதுவின் “கால்களுக்கு” முத்தம்)

||
==
||
||

இடப்புறம் இல்லாத சிலுவையை

இடப்புறம் ஊன்றி நடக்கிறேன்.

வலப்புறம் வா,

இடக்கரம் தா.!

*

||
==
||
||

எனது இடப்புறத்தையும்

உனது  வலப்புறத்தையும்

நனைத்தது அம்மழை.!

*

உன்னை கடந்து செல்கையில்

மிடுக்காக நடந்து செல்கிறேன்,

ஒரு போர்வீரனைப்போல் கம்பீரமாக,

ஒரு நடனக்கலைஞனைப்போல் நளினமாக,

பார்த்தாயா.?

பார்த்தாயா.?

நான் நொண்டுவதேயில்லை…

பார்த்தாயா…?

*

அது ஒரு நல்ல உணர்வு.

அதை நீ உணர வாய்ப்பில்லை.

அது அதிஅற்புதமான நிகழ்வு..

அதை பற்றி உனக்கு ஒரு எளவும் தெரியாது..

அது.

அது..

அது...

காலிப்பர் துளைகளுக்குள் காற்று செல்வதைப்போன்றது.

*

கூட்டம் மிகுந்த மாநகர் பேருந்தில்

மாற்றுத்திறனாளி இருக்கையை மறுதலித்து,

நின்று கொண்டே வந்தேன்..

                                        (                )    

அப்போதெனக்கு கொம்புகளிருந்தது.!

*

நடைவண்டி பழகா பால்யத்தை,

ஊஞ்சல் ஆடா பால்யத்தை,

கிட்டிப்புள் விளையாடா பால்யத்தை,

கிரிக்கெட்டில் ஓடா பால்யத்தை,

மிதிவண்டி ஒட்டா பால்யத்தை,

தீயிட்டு கொளுத்தலாம்..

காறி உமிழ்ந்தபடி,

நெருப்பை அள்ளி நிழல் மீது கொட்டினேன்.,

பயந்த நிழல்-என் முதுகின் பின்னால் ஒளிந்துகொண்டது.

நிழல்  எரிவதில்லை,

நெருப்பின் நிழல் நடனமாடுகிறது

துறவியின் துவராடை ஆடுவதைப்போல

பயந்தாங்கொள்ளி பக்கடா....

பருப்பு சட்டிய நக்கடா....

பயந்தாங்கொள்ளி பக்கடா...

பருப்பு சட்டிய...

பால்யம் பரிகசிக்கிறது..

||   (crutches- இடப்புறம் இல்லாத சிலுவை எனக்கொள்க)

குறிப்பு: கால்கள் என்பது ஆர்.அபிலாஷ் எழுதிய நாவல். இதன் பிரதான பாத்திரமே இக்கவிதையில் குறிப்பிடப்படும் மது